ضاق الخاطر

ضــاق الخاطــر

ضاق الخاطر بالمحاين والتزعاف ** لز المر اللي اقوالوا تتخالف

فات اومافات عنك واش خلاف ** الفرقة وسات بالراي التالف

بيع القوزة جار عنو بالتكواف ** الميزان عصى لصروفوا خالف

تضارب سوقوا روجولوا عن لصناف ** الشاري بالسوم ماطاق يوالف

الحق درق طغاو عنو بالتجحاف ** نصابين الزور عنو تتحالف

لم اشكالوا من الصابي والحلاف ** حرافين القول تظرم تشالف

طاق على من طاق اعفس لامن شاف ** يا ويل اللي صادفوا سرب حلالف

لاصالح لازايروا عنوا ماناف ** ضرب ايقطع على اجساموا متخالف

غمام السيبة حاطها داير زحاف ** قمح الزربع بين الراحي والعالف

غاب الميز على السايس والعلاف ** سقم التخمة عاث لخضر والجالف

اسراق الخيبة جرها بارد لكتاف ** مولى الرقم طغا باايمانوا حالف

صرحها بالهايفة واللي تضعاف ** كي تحضر لسياد يركع يتزالف

عبد وجايح صحبتك ليهم تتعاف ** طيش عنك لاش تشقا وتتكالف

هذا حال اللي انسلخت من لعراف ** هذا حال اللي مودر المقالف

كي دار الريح على المركب والقـذاف ** الموج العاتي دار عنو واتخالف