يا اللي شايفني بسبع ارواح

يا اللي شايفني بسبع ارواح

يا اللي شـايفني بـسبع ارواح...تدفنّي ونحيالك من تحت اتْراب
تـقـطّع فــيّ مــساء وصــباح...وانا صابر عـنك ما نرد جـواب
حـاكم قلبي مـا صـاب سـراح...بين صد وشد مـاذا شفت عذاب
صدّيت البـاب ورميت لمفتاح...وانا رجـايا في الله يفتح البـاب
قصّبت ريشي وفصلت لجناح...طيّشتني من كاف عالي لشعاب
بعتني في سوق جْلَبْ بِالْمُـبَاح...شَـمْرُوخْ دَقْـلَه غِي لَسَّـعْ كِطَابْ
اذا كان ذا حب نقول السْماح...ومن اليوم انايا ما عندي احباب
يا مشرّبني من المرار اقـداح...وانا نعذر ونفـتش لك عَلْاَسباب
ومـهما تدمن انت في الجراح...نخـبّي ونطبّب جرحي بلاطباب
لا تامن الحال اذا هبت لرياح...فالصّيف الصّايف تغلّق بسحاب
ولْواد الْعطشان لّي ماه شحاح...غي قديره لْهايج يغطّي لهضاب
جْـبال عاليا تبسط تولي مراح...وجْليد الجَّامد راه يحن وينساب
مهما خنقتني دمعا ونبات نواح...فات الليل نتنهد ماغمضولهداب
اناصنت هواك بدموع الاقراح...وعـشرتك درتها قصيدي فكتاب
مانقد نوصف زينك ماني مداح...عطاك الله الزّين سبحان لوهاب
حواجب نونين تحت جبين وضّاح...والعين ياالخدّاعه طبعوهالهداب
والخـد المـورّد قريب دمّه سـاح...والفـم خاتم فيه الجوهر سخـاب
والشّعر سدل كواد المسك طاح...يا مـاشط الحرير لافايده لاتعاب
والوجه الباسم اللي شافه ارتاح...يروح حزنه والسّـعد يجيه للباب
والقـد مقدوده تـبان وسط الملاح...مثل اذْهب ولمعادن عند الذهّاب
لاه جفيتِي قلبي سـكنوه الاشباح...وما بقات بعدك عشره لاصحاب
فرقتنا الـدّنيا مـنها غـابو لفراح...وعشرتنا صافيا مافيها ما يتعاب
شفتوش طير يفرفر بفرد جناح...ما طار وعلّى مامشى مع العياب
ماطلع لشجره فيها عشّه يرتاح...ما فك روحه من الهـوام والعقاب
مكسورْ لْخاطر ولْحُزن به دوّاح...وغريب تـايه يـبكي بين الاغراب
من شرّد قـلبي وزاد به النـواح...ما قـدر يـنسى وطـال بيا العـذاب
اللّي والفتُه لْيوم صد عليّا وراح...و سـكن البـعاد لا بـريّه لا جـواب
زعمه سكّنته البرج العالي طاح...زعـمه حبّـيته و لقـيته غي كـذّاب
يـجْـبر عـليّ الله نـبْرى ونـرْتاح...من كـيّتها اذا كانت هي الاسـباب
ويعـوّضني ربّي عللّى منّي راح...ما ضاع عـنده حــق وراه طـلّاب
ولفي نلاقيك يوم تتلاقى الارواح...وقدّام المولى كل حد عنده حساب
الدنيا تروح ما يدوم غي الصلاح...يا سعد فـاعل الخير عند الوهّـاب
وجـهي فالارض ونطلب السـماح...يامـولايا توب عليّ وانت التـوّاب
صدّوعنّي لصحاب كحطّو الالواح...راني وحيد نرجا رحمتك فالعقاب
لا اله الا الله كانت ديـما المفتاح...ياربّي ثبّتناعليهاتكون هي لْجواب
نسيم