اكّر نوض ولدي

اكّر نوض ولدي (قم و انهض يا بني)



اكّـر نوض ولــدي فيق وخمم...
لا تخلّي طريقك يضبّب غيمها

شفت الذيابه قبل الصّياده تتلم...
ومـنها الذكـر يـسبق حــريمها

شفت النّمل مثل الجيش منظّم...
يلم الحبّه ويعدل في تقسيمها

شفت السـبوعه تــزهر وتــزدم...
وتطــعّم ولادها غـزالها و ريـمها

شفت الظّـلم غـي عـند بـنادم...
كبيرالناّس يضل و يأكل يتـيمها

وشفت يابني الِّي بالجور يحكم...
يوم رَيْسوُ من النّـاس غـشيمها

وشفت الرّبا يفرض علَى لْمسلم...
والرّشوه بالقانون ليها مراسيمها

شفت حـال العرب مـاش مسقّم...
و امّـة العدنان كـثـرو مـظالـيمها

فلسطين هي عرض اللّي يحشم...
و غزّه شـرف الابـطال و ترنيمها

والقـدس ســرى ليها ابوالقـاسم...
و عـرّج للسّماء وجـاب تعالـيمها

والقـدس لينا مـن بين كل الامـم...
كالعين فالوجه محسن تصميمها

وعـلاه اليوم ننسى وفيها نـسلّم...
والدنيا ذي زايله يصعب تقيـيمها

شـفت ملـوك تـكنز المـال وتلم...
ورعيّه تسكن ديــار لزم ترميمها

امـشي بالمقلوب اذا انت تْنَجَّم...
يابني والعداله ما تكون غـريمها

سبحان منْعَلَّمْ لِنْسان مالم يعلم...
والنّفس اذا ضلّت كـيف تقـويمها