شوفى قد إيه ....

شوفى قد إيه ....
صلاح جاهين ..

يا بخت من يقدر يقول ..
واللى ف ضميره يطلَعه..
يا بخت من يقدر يفضفض بالكلام ..
وكل واحد يسمعه..
يقف فى وسط الناس ويصرخ: آه ياناس ..
ولا ملام ..
ييجي الطبيب يحكى له ع اللى بيوجعه ..
يكشف مكان الجرح ويحط الدوا .
ولو انكوى ..
يقدر ينوح ..
وأنا اللى مليان بالجروح ..
ما أقدرش اقول ..
ما اقدرش ابوح ..
والسهم يسكن صدري ما اقدرش انزعه ..
شوفى قد إيه ؟

احنا النهاردة إيه فى أيام السنة .
شتا واللا صيف ..!
وفين انا ..
إيه اللى وصلنى هنا .. !
أنا صاحب البيت واللا ضيف ..!
صوتي انحبس ..
ما اقدرش اقول ..
ما اعرفش حاجة عشان اقول ..
ما اعرفش غيرك انتى بس ..
يا بت يا للى ف حبك العقل اتهوس ..
مكان غريب ..
كأنه سجن كأنه مخدع لحبيب ..
كأنه بير ..
شباك حديد وعليه ستاير من حرير ..
والريح بينفد منه زى المسامير ..

الريح عوى ..
قلبي انقبض ..
قلبي اتلوى ..
الشمس تلج اصفر شعاعها صاروخ هوا ..
الضلمة تلج اسود كتير ..
ألوف ألوف القناطير ..

خبينى فى شعرك يا بت ..
أحسن عروقى اتخشبت ..
شعرك خشن زى الحِرام الصوف يا بت ..
خبينى فيه م الزمهرير ..
ونيمينى فى السرير ..

دخل النبى بردان خديجة لَفته ..
حطت عليه غطيان لحد ما دفته ..
دخل النبى بردان وقال: فين الغطا ..
البسمة غطت شِفته ..
__________________
__________________

جمــــــــــــــــال

أقول للناس للاحباب نحن هنا
أسرى محبتكم فى الموكب السارى

موقعي في الحوار المتمدن - عربي
http://www.ahewar.org/m.asp?i=2548

موقعي في تويتر
https://twitter.com/Fatiaa_F

موقعي في الحوار المتمدن - إنجليزي
http://www.ahewar.org/eng/search.asp?

مدونة موسوعة شارع المتنبي
https://shar3-almoutanabi.blogspot.com/