راس النعامه .......نائل المظفر

راس النعامه

اليمه بالرمل راس النعامه أندفن
طز بفصول السنه النه ابردن ان دفن
مو مثل روحي كطن وهمومي بيها اندفن
-----------------------
ومحد دره خياطهه في داخلي أشكطعت
وشكد امرني الوكت ياصاح وشكد طعت
وشچم جرح كط ونا غركان وشكد طعت
-----------------------
بس كون اطلع ردت واطلعت كطعة حزن
جاتفني وكتي جتف وحباله بيدي حزن
وزني نص اظلم نصاً حزن راح حزن
-----------------------
وبين الظلم والحزن نصين انه منفقر
بالمنفه ابني الوكت كالولي بالمنفه قر
قر من شني تشتكي كتله اشتكي من فقر
-----------------------
بس انه مو من فقر جنت اشتكي من ظلم
من ظلم لاكن خفت ماكلت انه منظلم
الوكته ظلمه صبح يلكه ضي منظلم
-----------------------
مليت من ظلمتي والوكت بيه جرم
اجرام ترس السما ماشع عليه جرم
ياربي وين اشتكي والشكوى عدهم جرم
-----------------------
كال الله لاتشتكي انه الله والشكوى ألي
مو للبغض حيدره ياعبدي والشكولي
وبصوت مؤمن صحت على البغض والشك ولي
-----------------------
ولي دربنه عدل عن الجدم منزله
باوع لأمامك علي ناصي شكثر منزله
وشكثر سكنو قصر محد على منزله
-----------------------
بس اني كلبي غرك واستنجدت صاح الي
مامدلي جفه الردي مره ولا صاح الي
ياصاح انجدني وك ماظل كتر صاح الي
-----------------------
لو روحي كطعت صخر وانته اغركت لنجتك
جا ليش بيها اكسرت وتندمت لأن جتك
ماردتك تذب زرك فوكاي من لنجتك
-----------------------
ردتك تذبلي حبل بلكت اكض بالطرف
عينك شني ومابجت سده دنت بالطرف
ياجار فازع الك بس اني ألك بالطرف
-----------------------
وبسيوف اجولك امس واني اوكفتلك درع
المفروض من اغركت ثوبك تدرعه درع
والجيش يفزع علي بحري ومشات ودرع
-----------------------
شو جندي واحد اجه ومات الكلب جا ملك
ياكلبي جف الردي من ذا جذب جاملك
يدري بضميره يحط فوك البحر جامه لك
-----------------------
ياحيف كلبي غرك ومحد حبل تف عليه
وياروحي مثل الكلب حرتي شنو تفعليه
لتعاتبين الوكت هذا الوكت تف عليه
-----------------------
مكلوب مابي عدل حتى الصدك بي جذب
ويادنيا صرتي بحر ومجتوف انه بي جذب
ياروحي عالتهلكه مجبور أنه بي جذب
-----------------------
والدنيا ظلمه وعصف ومااكدر بجوها ارى
ياحيف غشني الذي عنه كلت جوهره
ثاري انه صوتي صده وهو صدى جوهره
-----------------------
بس هسه لا ميزت بين الصدى والفضى
الواطي واطي يظل لوصيت غطه الفضى
وماألفظ اسمه لأن يكبر أذا ألفظه
-----------------------
ويصير ياصاحبي راس العبد نستله
وبأسمه يتونس لأن اني الي ونسته اله
لا خل يسل خنجره من ايده ثق نستله
-----------------------
وبأسمه لايفتخر حتى القرد عده اسم
والعظني كبله انكلب حتى العسل عدى سم
ملتمه ناسه عليه بس موعليه عدسم
-----------------------
وعافوني كلهم لأن شافوني ماعدي شي
صح اني ماعندي شي ينسرد بس عدي شي
والصفكوا عل شعل ماصفكو عدشي
-----------------------
ياغيمه عوفي المطر ظلي علي ظلي
ماريد اشوف الشمس كبرت علي ظلي
بالدنيا المن اظل بيها شنو ظلي
-----------------------
خاطر عليه تمن واني احتمل منها
اسنين بحياتي عشت وشحصلت منها
لاحصلت من هلي لاحصلت منها
-----------------------
ولاحصلتي بشر يدفني حي واندفن