حفلة كفرحيم
حفلة جمعت الشاعرين محمد المصطفى (السيد) وزين شعيب, وكان موضوع التحدي
(الأخذ والرد).
محمد السيد
هلا بالمجتمع بيضو وسمرو شهر بالمعمعه بيضو وسمرو
ناس بيسكرو عخمر اشقر أنا قلبي لقى الجمهور خمرو
شفت يا "سينما " كرمك مشجر شجر إخلاص ومشنشل بثمرو
ثمر ناضج على الكرسي بيسهر جمع من موسم الأفكار غمرو
مضى نيسان حامل حلم أخضر بيوت النحل منهاالشهر عمرو
ندا نوار يحمل شال أصفر غصب عنة لأنو تحت أمرو
رجع "بالاوبرا" هلل وكبر ندم عما فعل يكويه جمرو
إذا بنيسان أخر سبت ختير بوجوه النيرة وهيك حفله
رجع يزهي كأول يوم عمرو
****************
بعد ما زين عالمنبر خضعلي ختملي بصمة كفوفو طبعلي
ما بستقرض إسم حنا وأحمد إذا ما الفعل من إصلي وفعلي
البعض يحكي علىالسيد محمد إلو في ظلمة الأديان شعلي
يشق الدرب يمشي بكل مقصد تإركعلو مطول ما ركعلي
بصلي بصوم بعبد رب يعبد عبادة حق رشوه ما إندفعلي
يا ربي شو عملت تالحظ أبعد وأنا بوادي القداسه خلعت نعلي
بعد عني السعد ما كنت إسعد وإلي في كل وقت غضبه وزعلي
ونجمة بوذنب في ليل أسود بتطلع في السنه مره ع مره
ومعاها زين بالسحبه طلعلي
****************
أنا مجبور كل شاعر مسافر معو سافر وإطعم زاد وافر
شو جابرني وإلي دنيا وسيعه عنجم سهيل ما إبحش محافر
أنا المحقوق قسيت الطبيعه على الشعار صفى القلب نافر
وإذا لينت هالنفس الوديعه يلوموني ويشوفو الخصم ضافر
على الحالين في أي وقيعه صرت منصاب في الحظ كافر
بعد ما بكون قائد في الطليعه بجي جندي مع جنود المخافر
بإي مذهب وإي شريعه غزالة شعرنا محك الأضافر
بعد مابهالدني القمه المنيعه وبالغابات كتفت العذافر
دبوني بوديان الشنيعه يا الله ذنبهم لا تكون غافر
لوما تهبط القمه الرفيعه على سفح الجبل ما مر مهري
عظهر الغيم دعاس الحوافر
*****************
ت عاشر مدعي مالي سلاطه مسمك جبهتو من لوح لاطه
إذا من مدفعي كلمه بفجر جبل صنين خيطو خياطه
إذا ال مثلك بقي قلبو محجر عليي وانجلق يعمل بلاطه
بعجرم خلقتو الحقله مشجر يا خشبه تحت جاوزر الخراطه
جايي مجعلص وعينك مفنجر ساعه إدعى ساعه بساطه
شو فكرك نعملك "هنري كيسنجر" مع ولاد الزجل تعمل وساطه
حرام الشوم عقلك روح نجر عقد مليان أقسى من البلاطه
إذا من طابقو بدك تأجر فيك تنفدو بعمله قديمه
ببرغوثين ونحاسه فراطه
***************
عليي تأمرت بالشعر عصبي تتبعثلي بطل خيال قصبي
أنا حصان الزمان بكل مشهد العصي أمري ما بأكل غير قصبي
الله بيشهد وفعلي بيشهد الدهر خوان متآمر عغصبي
جعلت بقوتي أضعف وأزهد من البرغش تحت مداق حصبي
زرعت المرجلي في كل معهد أرض جدبه بدم الشوس خصبي
بعد ما بينت أقدر وأجهد من الدهر ال أكل من ثمر نصبي
قصد عزمي طريق الغاب مهد اللبوة حلبتها سرقه ونصبي
قشعني بعلها السبع وتنهد شلخت الليل عن جبهة سنينو
ولزقتو ععيون السبع عصبي
****************
إنتبه مظبوط لا تفشي بسرك أنا رح بعمل الشئ ال بسرك
بعد ما بقطعك رح جيب قفي فيها كوم عظامك وسرك
قفي خمرك من ال وج قفي يا هاوي كل شئ بالكون ضرك
ما فيك القافيه مثلي تقفي ولا زوجنا الشعر تيصر ضرك
ولا فيي إجرمك علوح دفي ولا محتاج إحسانك وبرك
لأنو ثوب عيره ما يدفي وجمل حقد العدى حرك وبرك
وإذا شعري رقص عخش دفي خزنت الدر في بحرك وبرك
البحر والبر ملكي وما بلفي حدى ولا عازتي بحلوك ومرك
وقبل ما خلقت طالعت بملفي عإسمي كل إشئ غالي ت مرك
حرام المثلك يصفي بصفي ويجي عمركز الغالي مزرك
إذا بمصفايتي حبيت صفي قبل ما حدك بصوتك وزرك
بلاقي تجرتك مش رح توفي يا جايي عالسبق مفكوك زرك
بكفي بهوره فنك بكفي فقس من بزرتك خولك وشرك
بزر جرجير ما بزينك بكفي مهما عصرك ّبدي وشرك
إذا كنك جبل شلتك بكفي عجنتك عجن في نحسك وشرك
وشلحتك عالودا شلحه بخفي تزعت الأرض يبس العشب فيها
محل الكف ما زتك وورك
***************
زين شعيب أبو علي
صباح الخير يا أستاذ سيدي مساك مبارك وليله سعيدي
سألنا لك يا سيد كيف حالك إن شاءالله بعدها الهمه شديدي
سنه صرلي ما شفتك شو جرالك المسافه بينا منها بعيدي
أنا مشتاق عهيبة كمالك مثل شوق المناجل للحصيدي
إعتدنا عليك عبركة فضالك على إسمك على السمعه الحميدي
ما عدنا نقدر نربي بدالك العتيقه كثير أحلى من الجديدي
يا سيدنا سمعت" بو زيد " خالك الخبر مظبوط يما مش أكيدي
بقولو كم عنتر من رجالك من اللي بيخدمو القصر الرشيدي
بقولو النسر بالجو إنحنالك قبل ما تقوسو بيسقط طريدي
بقولو النمر ما بقرب مجالك ولا بيظهر بوثباتو العنيدي
شهر بظل يرجف من خيالك إن قشع رسمك على شقفة جريدي
على المسرح صعب يثبت قبالك حدا بهالعصر يا عصر المجيدي
إلا إن عاد "شوقي" وبجمالك إن فتن بجوز ينظملو قصيدي
لانك سبع إسمك رأسمالك زئيرك فلسفه وشعرك عقيدي
لكن يا سبع لا تشوف حالك عللي بخنصرو بيطوي الحديدي
المثل عنك حكي كلمه وومالك تعى إسمعها مضره مش مفيدي
إنحني وكتف يمينك في شمالك كل سبع في إلو جنزير ماكن
وإنت يا سبع جنزيرك في إيدي
*****************
أنا من بعد ما فضيت بالي من ال قالو وبقولو أرتجالي
سلاطين الكذب لبست كفنها وتركت ال خاصموني تراب بالي
وتركت تذكره مفقود منها الأسم والجسم والشعر الخيالي
لا بطرس كان راضي ولا حسنها تجي مع بو علي تعيد الليالي
رجعت شديت للمهره رسنها بوجه خيال أضعف من خيالي
وعنجمة بو ذنب فتشت عنها وقطعتك بدل امضايئ لحتى
إذا غنيت ما غني لحالي
**************
يا سيد حاسبك خيي ومني وأنا منك إذا صح التمني
التعصب بالطوائف ما بريدو إن حكيت الحق ما بخيب ظني
أنا هالكون أكبر من عبيدو وأصغر من آلهو اللي أمتحني
السيد خلق للشعر سيدو ولا كل من فتح نيعو يغني
بسنة الماضيه المنبر عميدو حضر حفله وما كان الفن فني
إسمعت كلمه إنخجل ساعي بريدو إن دخل عالأن فيها ما يأني
بديك مشحم ملحم حديدو إفتكرتو بتربحو طني ورني
إستحو وهالحكي قصولو وريدو العطوكن درسهم مش هيك هني
أنا حبيت هالمشوار عيدو معك مش عن تسرع عن تأني
لأجل البهدلي الشعر بقصيدو قبل ما يفهم المنبر تعني
يا سيد بعد ما زرعك حصيدو فرفط غمر أحمر غمر بني
رجعت هالبنك ردلو رصيدو تردك للسيادي ال كنت فيها
وشيل البهدلي عنك وعني
***************
يا سيد سيفك المسموم سلو إذا بتقدر بدم شعيب بلو
البشر لو ذيبها بيغدر غنمها بلسان الشرع شو فينا نقلو
قبلك إبن ملجم ما لجمها لنفسو عند ما الشيطان دلو
إجا بوقت الصلا الفرصه إغتنمها قتل يللي وراه الجن صلو
أنا مثلك من الجنوب ال حرمها الظلم لما رجال الخير قلو
عند ما بديت تثبت قدمها رجع جوهر أملها عمحلو
يا سيد يا بن عيله بحترمها كرامة سيد المطران جلو
موسى الصدر للشيعه علمها وأنا شعري علم لبنان كلو
********
سأكتب لكم بحرف التاسع والعشرين ..
موضوع: حفلة كفر حيم 
الأربعاء مارس 25, 2009 11:20 pm
