فى بلدنا

شاعر اسم الدولة : مصر

فى بلدنا

فى بلدنا
أول ما العيل يِطْوَّل حبه
وتشيله رجليه
يبدأ كل صحابه
يِفَتَحُوا فى عينيه
أيه رأيك فى البنت فلانه ؟!
دى حلوه
والتانيه ديّ غَلْسَّانِه
والبِنت البيضه
أم ضَفاير صفره بِتِتْمايِل
وِتْهِزْ بِوِسْطْ
وجسمَها فاير
والقمحيه شايله الزَّلْعَه
ويْبُص الواد
ويقول : مايعه !!
ويفتَّح فى عينيه الأصحاب
يمشى ويفتَّّح كُل الأبواب
صَيَّاد وعايز يِصطاد
وِشِباكُه فارْدَه على كُل مِدَاد
ويُقَف على ناصية شارع
يُصْفُر .. يِتخانِق .. يِتْصَارِع
ماهو عايز يبقى فِتوه
ولا كل الفِتوات
علشان ما يبقى الفارس
فى قلوب كل البنات

والبنت الحلوه العايقه
بِتتمايل كالمُرْجِيحَه
وطُول ما شباب الحِته واقفين
تلاقيها جايه وريحه
تِكبر والقُصه بِتِطوَل على قورتها
وبتدلى
أبيض وأخضر وأحمر
وبكل الألوان تَتْحَلَّى
عايزه عريس
خايفه ل تِبُور
وعيونها مِهاجره تِلف تِدور
بِِتدوَّر على أحلى العرسان
ما يهمش إن كان
دكتور وللا شيال
بيهم الواحده
إن الراجل
يُسْتُر بيته ويسعدها
ويِمْلا دَارها عِيال !!