لشاعر :عريان السيد خلف

أعز من روحي أحـِسـٌكْ
وانته اعز منـٌي
ياحسبة عمر ..خاويتها إمن إصبــاي
بـِطلـَتْ صـَفنتي .. وما بَطـٌلـٌتْ مني
أحــِس كًًُــَلبي الفـِضـِي..متعوب حد الويل
وأدعيـله الصَبُر.. عن لا يفشلني
جَسٌيت الليالي ابمرود الحلوات
وسنين العمر بالشيب جسنـٌــيٌ
اضحك للبجوا.. حد شرهة المنكـَود
وابجي ابكل مزنتي.. الطور المغني
لاغرني المدح... بشفاف المحبين
ولاهـمني الشماته اشما حجوا عني
يلتمٌن علــٌيه... امشتتات البال
وانفضهن نفض
وانهض ولا جنــٌي
وليت.. وعف ضميري .. وماكسرت العود
ولـِسـِن.. شبه الزلم .. بالعلن سبــٌني
كـفاني امرح.. ورع.. والتذ بحب الناس
وعملات الكـَبح .. ما يوم خاوني
لا ِزحتْ الحيا... ولاضيٌعت معروف
ولاخنت الوفه.. وربعي اجفلوا مني
أضحك بالوجوه.. ابغير راحة بال
واصبر لو .. ليالي العسر ضكني
واكابر عالشدايد ... حد مصب العين
واسكت.. لو دثو من الناس لاسـٌــني
واسامح .. ما أبحــٌـر.. وين حد الغيض
وأزلف ..لو حوافي الزعل وازني
وينشدني صديجي ..المانشد عني
كـَـبل طبعك الونــٌـه ..وصاير اتغني؟
كـَبل عينك محطه .. وخاطرك مكسور
هسه اعله الثجاله.. اتفوت متحني؟
واجيبه ابكل برود .. وعودِتي ابسـنـُي
استراحت مستحاتي .. وعاكستني الريح
لاني من الهموم . ولاالهم مني
أنا ابن العاصيات .. من الليالي السود
لاريد الكـَـماري .. ولهن يردنـّي
ارضعتني امي ابدمعها .. من عرفت الصوت
وغطـّــتني بحزنها ... من مشت عني
خذت روحي اعله ضيمي ..وماشكيت الحال
او يمنــّـوني: اشتبي؟
وما كــَـلت: متمني
علـّمت البعض .. نكـَــل الجدم عالكـَــاع
وأول ما مشن.. بالزلكَ لبــّــني
اكــَول : اتغـّيرَت... والناس ماهي الناس
رضـّـاعة قواطي.. وخـّيبوا ظني

حِنـٌي حِنـٌي

* * *

حِنـٌي حنـٌي
اشويه ياعين الخشـــــف
خزرات المعاتب جونــــي
من كثر مالوع حتى اهلي
اصبحت جزعانه مـــــنـّي
رافكًــتني الونـٌه والحسرات
من بطن الحِمَلني
اوْهــذا عمــري
امكًـالب اوْيه الضيم
مامر الضحج مـّره اعله سني
اوْهذا حجي الناس اون من لوعتي
اوكًــالوا يـَغـَِــنـّي
فـَتـٌر إعيونـَك
تره اعيونك كًـصن بسنين عمري
إو ذوٌبـَني

آنه أحِب منهن نبـِل مغتــاض
خلهن يوجعــنـّي
ذابل وكَـاصي
العطش وياي جاهلبت رونــّـي؟!
انـسه حزنك لايحن حــــزنــي
اوْعلى اعناد الحزن يازين اغـَنـّي
حتــّه اصيحن ياحسرتي اتباعدي..
اوْيابسمتي الضاعت تـِدَنـّي ..
آخ مِنــٌي
وآخ من عمـري الخلَص
بس بالتمنـٌي
وسـِرِت بيها وصحِت عِنـٌي
أنـه ياروح هدوة ليل
موش اول هرش واسَن بسبـّاحي ولِونـٌي
آنه مثل الناس لِكزَنـي إبرمح بوكَ وجِفَنـٌي
ضيٌعَن دمٌي ولا جنهن الكاتل وأنكرنـٌي
يالتلجـٌيـن إعلـَه
شوف السود بس اكًـفن نســــني
ثكًـلن حمل البعد وآنه الرجيج اوْكلفني
ذو بي من نار الجفه اوْبدموعج اليجرن
تِهـَنـٌي
اوْعني خليني استجن يمعذبــــه
اشتردين مني؟
اوْهذا عمري
امكًـالب اويه الضيم مامر الضحج
مرٌه إعلَه سنـٌي
هذا حجي النـاس
اون من لوعتي اوكًالوا: يغنـّي

رِدٌي رِدٌي

* * *

رِدٌي رِدٌي
ياظعن شت عن هَلـَه
اوْحدّاي غـُربه
البيــه يحــــدي
ردّي...
ينباع العشك
والياقلب تهوين صدّي
لاتهيجين الجروح..
اجروحي من تنلجم...تـِدّي
وآنه..من دم اوْ لحم ..
مو مـِن صخر..
جبدة العندي
ردّي...
مليت الصبر..
وأمكـًاطر الدمعه..
اعـْـلـَـه خدي
وآنه.. خلا ّني الوكت
ناعور...
بس أترس.. وأبــٌـدي
جـّورت ليل الصبر. واعجزت مـِنـّه
اوْهذا احدّي
بلجي من يغفه الجفن..
ما جلمة التنكـًال. بعدي
آنه موش أوّل زند..
يشتل شلب..
ويحصد بردي
اوْلا نه بس اتغربت ..
والمعتنيله ...
ايصير ضدي..
رِدٌي . . . ردٌي
مال حيل امعاتبج ..
وآنه العليج إدٌييـت
جهدي
غلّـست.. عن الكًـلت والكًـال
كًـمت اسمع..وَعَدّي..!
اوْ صابرت صبر الطفل...
شربي الصبر...
والحزن مهدي
واحملت ليل العطش...
وآنه العيون السود وردي

أعاتب

* * *

من يمر بيّه حنين الصوت
اعاتب
ولو يمرني الطيف
يلكـَـــاني هله ويلكـَــاني غايب
مانه من كـَــد لهِْفتي لشوفك
شمع بسكوت ذايب
دكَ عليّه الباب
كـَــلبي . كــَـبل ما جاوب يجاوب






وابتسم لي الدنيه تحله
واحس كل الناس يحبّيب حبايب
وتدري.. من تكبر على اشفافك بَسِمْتك
يكبر ابكـَــلبي الهوى..
ومجبور اعاتب

جيٌة العيد

* * *

يناهي الشوك ذمٌـه وذات من ذات
وفرق مابين حالي وحالك إبعيــــد
سنه وصدٌك يِضَـوك الروح لوعات
ويجَملٌي الجروح جروح ويزيــــــد
أبات إبحضن صبري إليالي ويباتْ
جرح يصحه وجرح متغصٌب إيزيــــد
وأكًًول إشوالف السرحان للشــاة
إعله سـجٌه وكًاوداه الإيـيد بالإييـــد
إلك جـانت يحلو الطول جيـات
عجب تبخل علينه إبجيٌـة العيـــــد
تنينه وأملينه إجفونـٌه إبطيفْ
وصبرنه وصبـٌرينه الآه بـــــالآه
وتحسفنه الحســافه وحيف عالحيـف
عله إسواجي الدموع المالهن جـــــاه
إشيصير إعله الترف لو ينحسب ضيف
إعله غفله وعيد وصل الزين محــــلاه
أنه إبعازة الموت وحاجبك ســيف
وأمــوت إبغير صدٌة غيض ماريـــد
إلك جانت يحلو الطول جيـٌات
عجب تبخل علينه إبجيٌـة العيـــد

أحن لمسامرك ولكًاك شلكًاك
شَرِي المعشر حلاوة شــوك مابيــــك
ويمر صيفك صبر وتنَطٌر إشتــاك
تبيعك عزتـٌــك وبذلـٌـتي أشريـــك
يبو الروح إعله روح إهواك شلهــاك
وإهي إبعيـن الشفاكًـه إليالي تِربيــك
أبد ماسامرتها الآه لولاكْ
ولا جـان إعله دربك لاويــه الجيـــد
إلك جانت يحلو الطول جيـٌات
عجب تبخل علينه إبجيٌـة العيـــد
أنه ولا كًـول عنـٌك غير معذور
ولَو ماظَلْ عذر للروح ينكًــــال
لـَجَنْ ون ايساهر ليل معـذور
ألم لو من وكت لو من ولف شــــال
وانه إبحالي إعله صبرك حال مزهــور
صبر ومكابر المحتـــام جَتـــٌال
إلك عمري إعله زين وشين منذور
ولَو من السنيــن إوشال ما ظـــال
لـَـجَنْ يبقه الجفن للعين مسحور
ويظل راكد عليها النوم تركيــــد
إلك جانت يحلو الطول جيـٌات
عجب تبخل علينه إبجيٌـة العيـــد

خاف تموت

* * *

على طولك اشعلني...
وصيح بّيه الصوت
انه ابْطـَركَ النفس..
بين الحياه والموت
و ِسْري ابنبض دمي..
لشهكـَــة الزردوم
حب تالي العمر..
عِلـّـته من البسكوت
ياشايل حلاوة خوف الحديثات
ومحمّـِل سحر...
ضحكة بنات بيوت
يامايع ترافه..
اتهيّب من احويك..
خاف اصعب عليك..
وخاف بيدي تموت!
هَـلكـَد ما تِلِح..
راج الثـْمربالعود ..
وحْـمَر على اشفافك
كـَبل وكته التوت
يمعود ... دخليك...
والـقلب شيصير!!
من تِـكَـطعَ بتوته..
امنين اجيب ابتوت!