عبد الحسن ناصر الرويمي

للشاعر : ابو فاطمة الرويمي

لاتجيني


يالنسيت امحبتي وشوكي وحنيني



ويالبعتني وجنت اظن بالدم تضحي وتشتريني


وجنت اظنك توكف ابوجه اليضدني ويضد ديني
وجنت احسب عدي زلمه

اومن احشمه

بحور موت يفوج بيها ويعتنيني

وياحسافه اظنوني خابت خابت او ايست عيني



ويا هضيمه الجنت اتانيله نساني

وياحريمه اسنيني عشره ابدربه اتاني

لاكصدني

ولا شبخ جدمه وجاني

ياحريمة شلون تانيته ونطرته
وبعثرت لجله سنيني

لا تجيني لاتجيني



لاتجيني ولا بعد تسأل عليه

ماني بطلت المتانه

وما اريدن بعد جيه

ماني فتتني زماني

وطشراني بكل زوية

او لا كلب ضل عدي سالم

لا جبد لا بكت ريه

شلي بيك وشلي ابنشدك

عكب ماعذباني فراكك البيه بس اذيه

آه ياوسفه اشكثر دست على كلبي

ولا كلتلك عني وخركتلك ابجدمك دكوم اسحك عليه

وكتلك اردس فوك روحي

ولاتكول اشكد خطيه

وتالي تتركني وحيده

شلون الك روح اونست ايامنا الفاتن سويه

ايست منك يناسي

يالعشت بديار غربه او اجنبيه

ارد اكلك

لا نا ليك ولنته ليه

من الدليل اسمك مسحته

ورسمك البلعين شلته

ماتريد تشوف رسمك بعد عيني

لاتجيني لاتجيني

للشاعر : ابو فاطمة الرويمي

امل روحي
عفاك اشعطلك للحين يالكلك وفى وغيره

عفى عدك كلب جلمود ماحن يبني للديره

يالراضع وفى ابدرتي عفتني ابمشكله اجبيره

يحلو الذات يمعدل نفل ياطاهر السيره

امل روحي اكطعت بيه بعد ماعدي امل غيره

اجو ربعك ينشدوني

خبر ماكو اغركت يبني ابحر حيره

شكد ربيت الك يبني حسافه انكرت تقديره

اظل اتنطرك يهلال عالي اتشع تباشيره

حسن يبني الصبر جمدوب غزتنه ذياب شريره

الهظم بسيوف حش بيه وكتلني الذل يبو الغيره

زرعت عيوني بدروبك وعكلي انشده تفكيره

وانا الكلبي زجاج وهشمه فراكك بعد شيفيد تعميره



ابث وي هبة النسمات الج نجواي

يا اغلى واعز مخلوك عدي وسلوتي ابدنياي

يالبعدج سهم مسموم صاب احشاي

لا ما انسى عمري الفات لا ما انسى عهد ارباي

كل لحظه التمر مالوم وشكابين الهموم هواي

حك لو ردتي اتعتبين الج حك لو حجيتي وياي

لجن اسنيني طشوها خرز سبحه بخباط الماي

يتهدم امل روحي ويطيح شما بنى البناي

صفنت انا وطلعت ابراي صايب اعتقد هالراي

شفت ايزيد بجنوده يحشم وين وين عضاي

اظل ويه يزيد اشلون ترضين انتي يمه ابهاي

وسمعت حسين بالساحه ينادي من يجيب انداي

ركضت ابسكته اعلىالموت لاخر نفس اظل مشاي

تحت ظل رايته امحزم نذرت الروح اله وفاي

نذرت الروح اله وفاي

الشعر الشعبي العراقي

للشاعر : ابو فاطمة الرويمي

ايروحي


ايروحي صرتي ضدي ويالزمان ومن كبل متصافيه

اشكد غفيتي ابحضن دهري ولسه بعدج غافيه

وعلى ازنوده توسديتي والسوالف دافيه

نامي نوم المسعدات ونامي نوم العافيه

بينت كل الحقايق بعد مامش خافيه

انعرف ما عدج ثبات

ونيتج مو صافيه

افعالج اتناقض كلامج بينت متنافيه

اركضتي لشموع المحبه بوحشة ليالي الشته

التمطر نوايب حافيه

ولنها شمعات المحبه

اتاملي

بنفثة حقدهم طافيه

ارسمتي لوحة اعتذار وعدي ميفيد اعتذار

وحجتج مو كافيه

شوفي هاي غيوم سوده من الهديتي سنينج الهم لافيه

ونتي بيهم امنيتي

ويم ثنيتهم غفيتي

نثروا ادروبج وسايد من حرير وصدكيتي

وتالي بيها اتمزلكيتي

حيل وياج وبعد تستاهلين شما لكيتي

حيل

لنج مو اهل ود عاشريتي

انصبتي بسهام الغدر يوم ونسيتي

كالو ا احنا بساعة الضيج احنا عون

وصدكيتي

وتالي لمن جربيتي

الناتج اصبح بالخساره شما جمعتي وقسميتي

ذوله كل يوم اليمر خابط نبعهم

يا حسافه الهم هويتي

ما اضن غادر مثلهم لو على العالم مشيتي

نايمه وحدرج سيول اهل الغدر يالسيسيتي

وبلوى بيهم ايروحي انتي ابتليتي



الشعر الشعبي العراقي

للشاعر : ابو فاطمة الرويمي

سفر الغريب



امسافر ودقات قلبي اتسارعت ملتهبه نار

صرت مرجوحه ابهواكم ورتعش ويه القطار



1

ياطريق الامشي بيه اتامل اوجوه المشات

اتعمق بلوحة رسمهم جامعه انواع الصفات

اتسائلت ضامي ارد اشوف بيا كتر شط الفرات

اتجاوب عيوني الجميع امدوهن امن النازلات

هيمه دربك ماكو ماي تراوح ابكلب الفلات

شط امانيك سراب اعتقد جف نهر الحيات

ياغريب

امتيه ادروبك عجيب اومنخدع بالامنيات

صفي نيتك صفي رايك واقرأ بدروب الثبات

او مادروا جرحي كبير وبيه تشب نار الوشات

جاوبتهم غلسوا جن ماكو شي ولا لوتنه النايبات

يكفي لوم او غزل روحي امخلبص من المشكلات

ارد اكت دمع المحبه من الكلب اجلي الغبار

امسافر ودكات كلبي اتسارعت ملتهبه نار

صرت مرجوحه ابهواكم ورتعش ويه القطار

.............................................

2

في المحطة

مدري صدفه مدري يحدي القدر بيه بجيتي الهاي المحطه

استنتجت ماكو استفاده استنتجت كل جيتي غلطه

كلت بلكي اروى ابسعاده وترتسم بعيوني غبطه

لكن اجروحي جحيم ودارت على اوصالي خطه

اعجزت مابي ثوبي اشيله وفوكها على اجتافي جنطه

وفوكها اللايم يلوم او حجيه حش بحشاي بلطه

وين عنوانك رجاءا خلي فوك حروفه نقطه

آنا عمي مسافر بلي هويه اشعندك تحاسبني سلطه

آنا احب نور الحياة وروحي احب ازرعها وسطه

كف ملامك لاتدور علي سقطه

آنا غركان وتريد اتجمل الغركان غطه

ولنه يحجي بكل صلافه اقرأ شيكول الشعار

لنه مكتوب ابحبر دم لاتحبون الغريب

مولع ابحب الرحيل او ما اله دار اوقرار

امسافر ودكات كلبي اتسارعت ملتهبه نار

صرت مرجوحه ابهواكم ورتعش ويه القطار

......................................



اصعدت وعيوني ابدمعها والتفت يمنه ويسار

اتوسدت نار انتضاري وتدري يجوي الانتضار

دوختني وعذبتني الذكريات وزودت ناري استعار

وكلت بلكت جفني يغمض وستريح امن الدوار

وسلهمت عيني وغفيت ولن شبح جدامي صار

امنين جاي وشنهي شغلك اشعندك ابهذا القطار

بالعجل ابرز هويتك مدركك دون اعتذار

ردت اقنعه ابكل وسيله وردت اجاوب بختصار

راح ادور عن هويتي الظيعتها بلا قرار

راح اشك ثوب الظلام واصنع اخيوط النهار

راح اطك نبعة حيات وزهره اخضر بالديار

انا شكباني اعلى متني بعد ما عدي اصطبار



امسافر ودكات كلبي اتسارعت ملتهبه نار

صرت مرجوحه ابهواكم ورتعش ويه القطار



((((((())))))))))))



سرت بدروب الحياة ويحدي بحوالي النصيب

ولنه من وسط ازدحام اينادي واحد ياغريب

شنهي شغلك رايد المن هالشمس راحت تغيب

كتله مجروح واجيت الجرحي ادور عن طبيب

كال ..... الله الشافي هوه وريت ظنك لايخيب

فتح باب ...وكال عمي اتفظل الهذا الطبيب

ياطبيب........اتفظل افحص جرح كلبي من جريب

ابوسطه نار الوكت تسعر وبيه تحش انياب ذيب

وهاي روحي اسعرت نار وكل غذاها اصبح نحيب

وفوكجرحي

الشامت البايع ضميره ايعوج السانه ويعيب

عاين اجرحي وتحسر هاكثر عايش ......عجيب

اعتقد فاجد بلادك اعتقد عايش غريب

انا مثلك غربه جرحي لاتظن تلكاله طيب

ما كو غير اتراب صبخه اتذره بجروحك تطيب

ودعيته

ودمعه صب ودمعي صب وكلبي هرول للديار



امسافر ودكات كلبي اتسارعت ملتهبه نار

صرت مرجوحه ابهواكم

ورتعش وي القطار

الشعر الشعبي العراقي

للشاعر : ابو فاطمة الرويمي

ضمد جرحك اوغطيه

ضمد جرحك او غطيه ….

جرجك لحد ايشوفه

اوبالك لاتكول احاه

بحلوك الشماته اتصير سالوفه

ودمعك من تهله انوب

بالبسمه الدمع دوفه

وخل كلبك بحر يفلان

خل سفن الهموم اتنام بجروفه

درع خل كلبك او لتخاف

مو زلمه اليخاف او روحه مخطوفه

وتحزم للدنيا احزام

تدريها ابمخاطر دوم محفوفه

صبّر روحك على الظيم

علمها على كلشي ايمرها وتشوفه

وبالك لاتمد اجفوف

للمامدلك اجفوفه

وصديج الماينفعك ساعات الكلفات

طرك عشرته او عوفه

واذا عندك عقيده اونهج تمشي عليه

شيهمك اذا دهرك

يحد ويبرد اسيوفه