زوج حـمامات
زوج حــمامات وما دارو فــــــيّا---نبكي فـراقهم اللّي عــــذّبني
حوجي ديــــارهم بــعدت علــــيّا---ما لقيت دلـيل اللّي يوصّـلني
راهم مل الـــعــــز كي عيــــــنيّا---واذا بكــيتهم واش يصـبّرني
ربّــيتهم صــــغار بــين ايـــــديّا---راح الزّاجــل و مـا ودّعــني
ما خــلى مــــــاره ولا بـــــــريّا---غير ارســامو اللي تفكّــرني
والّلــي بـقـــــالي يـــحدّث فـــــيّا---بكّــاني حـاله راه غــايضني
يا قلب مــالك بــالخف تـــوالف---والولــف صعيب راه مايْـعف
شوف قبالك شوف لي شـايف---شـايفك بعيـنيه ومـا يــــرفرف
فاض اهبالك ونا غي نـساعف---وانـت النّـــيه غــي تــــدّلــفف
زوج حـمامـات وما دارو فـيّا---ســـيّبني غـــرامهم وعـــدّمني
ســابوني فطريق مـنهُ لّلي بيّا---غــريب وهــواهم زاد غـرّبني
كالخِـل كالصّـاحب صـدّوعـليّا---وحـدي هـامل لا من يــعرفني
قـــطْعو قــلبي بـينهم بالنّصفيّا---نص هنا و نـص راح هجرني
ما صبت نلحـق العـزيـز عـليّا---ما هــان نـخلّي اللي شـاغلني
دارو ارسـامهم فــي جـــواجيّا---ذا هــو الغــــرام اللّــي يــفني
يا قلب حــن وخـبّي لعـواطف---ومن العـــشق يــــزّيني وكف
يا قلب شـــكّيت رايــك تــالف---وانا حــسبتك رزيــن وتعرف
كــلمه ويــجي دمـــعي ذارف---ســـبّة ونــلقى روحي نـهترف
زوج حمامات وما دارو فـيّا---قــسمو قــلبي وش لي يُجبرني
كـالليل والنهار يــدورو عليّا---ماحـكمت لــيل ولا نْهار قـبلني
كون راحو لثنين انا ماذا بيّا---نــقطع لِــيّاس ونــبات مـــتهنّي
كون قـعدومعايا يديـرو مزيّا---نـولّي ســـلطان يا من تـسألني
في مملكتي والدنيا بين يـديّا---لااله الاّ الله هــــو اللي خــلقني
الصّلاة عل محمّد نورعينيّا---والسّــلام عـليه يــــرضى عنّي
ياقلب لَعمر كالبرق لخاطف---والـدّنيا مـــنامه تكــمل بـالخف
دير الخـير واسقي النّــاشف---و اعـفو عــلّي جـرحك يتأسّف
ماتدري الغد واش تصادف---و رضـا الله خـير لك و ألــطف
راه خـــراب جــوفي بـعدكم وقــــفر
حوجي ننظر للسـماء نرجا ابتسامه
قداش قالولي بالحب يــسعد البــشر
لكن الحب عندي صد ودمعه دوّامه