الزهر مسوّد والرّوضه حاصله

الزهر مسوّد والرّوضه حاصله

قصب وبنادر وزيد الطبّال...
وفرسان بارودهم يلالي...
وسمرات صغارزغاريدهم هايله...

والبرّاح يلوح فالرّايه بالمال...
يمدح الانساب لوّل والتالي...
و بنات بــلادي كالشـمس القـايله...

الهوي بارودي رقصة رجال...
نطّح بعيد لا تنطّح قبالي...
يا صياد لريام فـالصّـحرا هـامله...

انايا صـيّاد وقـهرني غــزال...
بسهام عينيه راد قتالي...
رمـينا وكــانت رمــيته القــــاتله...

مامُت ماحييت الجرح مازال...
مانسيت مالقيت غــزالي...
ولـيالي غــربتي قـداش طــــايله...

هايم مهموم نعدّي فالحـال...
الوحش صال زاد هوالي...
نــبكيها ودمــعتها ماهي ســـايله...

سكنت فالقلب وزادت البـال...
وسلبت روحي وش بقالي...
غي الشـــوق ونــيرانه شــاعله...

لـطفك يارب بقـلبي المـوّال...
مابغا يتوب مابغا يصغالي...
ويســوّل فيّا علّي ماهي ســايله...

خلّوني نزها ذاق بيّا الحـال...
بدمعي نضحك كما يهوالي...
الزهر مسوّد والرّوضه حاصله...

واستغفر الله مغيرالاحـوال...
ونحـــمده على ما عطالي...
ونعمه آجله ولا سخطه عــاجله...