حبّك وحده يكفيني
ما غاضني غي راك نسيتيني-----وطفات ذيك الشّعله الـضّـوايا
وفي بحـر النّسـيان رمـيتيني-----صـدّيتي وقلــتي تمّت الحـكايا
وانا ما زلت كـما عـــرفتيني-----القلب مولــوع والدّمعه جـرّايا
مازال حـبّك مـعشّش فْـعَـيني-----وناروحـشك في الكـبده كـوّايا
نقـبل يجـي المـوت ويدّيــني-----وما يقولو ولــفك انت نـــسّايا
ولو نعــرف الـــواد مـــدّيني-----والموج هــايج يقطّع عـضايا
ولا الفــراق يا ربّـي حـنيني-----قـد ما بعــدوها راهـي مــــعايا
حبها راه مكتـوب عْلَجْبـيني-----محـفور عـلى قـلبي وْبرضـايا
ما نسـيت مـا قلـت يـزّيـــني-----ما عيـيت انـا بحـبّك يا نــسّايا
لا لي صــدر حنـين يدفّــيني-----بـعدك يا ولـــفي خــاب مــنايا
سـاعه عـلى سـاعه عـدّيني-----ولا تحطّيني فـي سطر النّهايا
بـين القـراب لــيك حطـّــيني-----امّـك وبابـاك ماهمش اعــدايا
كوريقـات الورده لـــــمّــيني-----وشـمّي وحـشي مخلّيه ورايا
غي حـبّك اللّي قــدر يبكّـيني-----والرجال ياولـفي ماهم بكــّايا
ارواحـي نحاجيك وتحاجيني-----لـــيل والقــمر ســــماه مرايا
حطّي راسك عليّ ســـاميني-----واسـمعي قـلبي يـدق البــدايا
انا مخــلوق حــبّك يكفــيني-----نصــوم الدّهر ونحـمد مـولايا
وكنشوفك وعينك في عيني-----نـنسى للّي قدّامي وللّي ورايا
ونحسبك انا وانتي تحـبّيني-----انتي روحـي وانا لـيك عــبايا
سـالي للّي كان بينك وبيني-----والغرام بالمـغزل دايـر سـدّايا
ما نـردّك ولا انـتي تـردّيني-----حــاشى حـبنا مـا فـيه خــطايا
كزوج حمام نودّك وتودّيني-----فــضحنا الفــراق وزاد بــلايا
سرّك حـامله محـال يعيّـيني-----حـتّى لذيك الـدّار نـدّيه مـعايا
اذا لاقانا المكتوب وريتيني-----يكفيني سماك انتي هو سمايا
فوتي كالغريبه لا تواسـيني-----غي انتي وانا نعرف الحـكايا
واذا حنّيتي بالعين بوسيني-----نطْحي مليح لـتقـيسي بحذايا
ملقّيلك قلبي زعمه يحميني-----هـو المقـيوس ما طلب دوايا
كيـــْتك تبرا وربّي يعـافيني-----لكن فراقك كـيته ماهِي شفّايا
نوصيك لا تنساي وتمحيني-----من كـــتابك اذا كــنتي قـرّايا
قولي كان هنا اللّي مقرّيني-----طـباع الحب والوعود الوفّـايا
كان هنا الحمام للّي يبغيني-----تـاج سـلطانه غـي حـبّي انـايا
كان طالق جـناحه مغطّيني-----يغــير من الشّــمس الضـــوّايا
مـعايا كخـيالي مـا يخـلّيني-----نـرقد وانّـــوض ديــما مـــعايا
عزيزفي قلبي وعلى ديني-----فحـضنه لقـيت عــزّي ودفــايا
قـولي ياولــفي وتفـكريني-----وعــلاش تــشفّـي فــيّا اعـدايا
رانـي من الصّـبر يكفـيني-----وعـييت صـابر ماصبّت سـمايا
نبكي بدمع الهجر يعزّيني-----يـمكن يــطـفّي الحـرقه الكـوّايا
نبكي ضاقت الدّنيا فـعيني-----لا مـن يعــذرني ويفـهم بـــلايا
نبكي الوحـش راه مـدّيني-----هــايم مهــموم والنّـاس شـفّايا
غـريب وذالحـزن كاسيني-----ثـــوب المـــسكين زاد عـــرايا
ياالعارم غي لقاك يداويني-----راهم الطّلبه حارا و فـي دوايا
يادرى ولفي تجي تلاقيني-----والا رجـعي لي قـلبي يا جـفّايا
ونولّو مانعرفك ماتعرفيني-----بـعدك يـبقى الموت هو مـنايا
استغفر الله هوللّي يهديني-----ويــوم الحــشر حـسابك معايا
والصّـلاة على قـرة عيني----- نــــزور قـــبره دايــم رجـــايا
راه خـــراب جــوفي بـعدكم وقــــفر
حوجي ننظر للسـماء نرجا ابتسامه
قداش قالولي بالحب يــسعد البــشر
لكن الحب عندي صد ودمعه دوّامه