حنْ يا ولــفي

يا حافر بير للي تونّس بيك

لا تفـرح كـثير وتعمّق فيه

ما تدري الدنيا باش تـأتيك

تلعبك شوي وتزرفك عليه

غـير ديـر النّـيه و أخـطيك

راه مول الحيله الله يخـزيه

حــبّيتك انا ونــويت فـــيك

وطـيتك قلبي لاه تـغدر بيه

وقليبي كالطّير متعلّق بيك

وين يروح كِأنت تـفرط فيه

رحت انت ودست بـرجليك

على حـبّه وكسرت جـنحيه

ما تحرّك اللي بين جنحيك

ما طاحت دمعه تـبكي عليه

يا ولفي تفكّرني الله يهديك

تفكّر القلب للي عزّيت عليه

عــشقك وذاب بـين يــديك

ودارك تاج راسه يفخر بيه

انحرق بالنّارباش يـرضيك

حنْ يا ولــفي وبـنظره طـفّيه

تفكر ساعه كنت مـساميك

نحسب ما درت لي نندم عليه

يخّي انحّي من فمّي نعطيك

ولّي عندي عندك مانسال فيه

يخّي نحل عمامتي ونغطّيك

ونفتح جـناحي وتـنامي عليه

نوشوش حناني كلام فاذنيك

نحدث في قلبك ونسايس فيه

حتى يــجيك النّــوم و يـدّيك

تجي السعادة لقلبي و تهنّيه