يا حّي عليّا وعـــلى قلـبي

يا حّي عليّا وعـــلى قلـبي*****شفتك كِللّي شاف لقـمر وكف*****يا حبيبي كأنّاك غي انت فالدّنيا
لاحني لْمالو جيت مدربي*****في بحــرك غامــق ويجــــيّف*****غارق لشـوشتي ومديـتلك يـديّا
صدّيت عليّا ماخُفت ربّي*****صـدّيت عليّا وانــتَايَا تعــــرف*****ما أقــسح قلــبك تخــــلّيت عليّا

ياحّي عليّا راني ممحون*****والدّمــع عــلى خـدّي ما يـكف*****راهـم شبعو بـكي عليك عيـــنيّا
خلّيتني مدلّي كالعرجون*****راه تـــمرو طــــــــاب وجـَــف*****ما خلّــيتني نـهنا مـا ولّـــيت ليّا
ماحسبت الْعشْرَه تـهون*****وتـــــنسى كــــل ذاك الولــــف*****وتـنكــرني بـين صـبحا وعــشيّا

ياحّي عليّا كثر تنـهادي*****جـيّاش وحــشي انا مـا يـــعف*****راه طـــــيّب جـــنابي يـقلّب فــيّا
نبات ساهر مع وسادي*****نحــكي له وهــو غي يتــّاسَف*****ويــبكي مــعايا عــلى ذي الكـــيّا
يا سواد قلبي وسـوادي*****في الحب جــيت مـن طـــــرف*****ما دريت لـِخَاطيني من اللي ليــّا

ياحّي عليّا وعلى زهري*****غرست الورد جــاب القـــطف*****وما لقــيت غي الشــوك في يـديّا
لخبّيته انــا في صــدري*****دارني عـــود وعـــليّا عـــزف*****وغـــــنّى بعــــــــذابي واللّي بــيّا
وماكفاه دمعي نا يجـري*****زاد ســـرق قلـــبي وخــــطف*****العــقـل راه مــــا خــــــــلاشِ فـِيّا

ياحّي عيّا وعلى الزمـان*****لَـــمَّد ْلِي امــْـــحانو وقــْـصف*****راح درعـــي اللّي يــــغطّي عـليّا
والدّنـيا ما فــيها لا مـان*****غــير تــــدور بـــــينا وتـــلف*****ما حلات لها غي دمـعتي السـخيّا
يا ولفي موحـش المـكان*****وعـلامك ماعــاد فيه يرفرف*****ومحــبتك في القلب مـا زالت حــيّا