يــــسلم مـن ســــمّاك

يــــسلم مـن ســــمّاك نــــــوال****نـلتي حبّي ومـا نلت انا والو

يا تـــــرى قـــلبك لـــيّا مـا زال****والا راح كدمـوعي لّي سـالو

ماعـليك لـــومه ولا أحمــــــال****الحق في قلبي تـبّاع هــــبالو

النـاس مرضت وبـرات فلحـال****وانا عـمري أمراضي طـوالو

مرض العـشق سـامور شـعّال****ذوّب الَحديد راهم عماده مالو

ومرض لوحش يقطع بفـصّال****ما بـقى فـيّا طــرف غـي زالو

ومرض لغربه قاسيتها شحال****اللّي نـخاويه يجرحني باقوالو

ومرض الحنين يجيني زلزال****رجـرج عـظامي ماقدّيت خبالو

ومرض لوسواس ديما فلـبال****يا لمّــيمه عـــقلي اعـــيا دلالو

ومرض لعطش ولمطر هطّال****يابس ريــقي والمـــاء قــــبالو

ومرض القـهرمـسلط جـلجال****يأكل من قلـبي ويـبات باثــقالو

مرضي يا ولفي دوّخ العـقّال****والطُـبّه ما قـــدروش لـنـــزالو

صبري لله لما يـــريد فـــعّال****صبري عليك وغيرك ما نسالو