صحراوي

صحراوي
صــحراوي و بـلادي رملة و نـخيل...
صــحراوي و اصـلي مـتصل ديما.

صــحراوي صـافي نسـبي والصّيل...
صــحراوي والجود خذا منّي قيما.

واحنا الاصل رجال جيل بعد جيل...
خــاوانا الـدّين و الجــزاير امّـيما.

صحراوي و تحت اڨدامي يــسيل...
غاز و بـترول ارضنا بالخير كريما.

ولي دفعنا لذا الوطن مـوش قليل...
ســوّل على النّــواوي و الجــريما.

صــحراوي و للّٰه الحـمد الجــزيل...
واحنا طيب لكلام ماتسمع شتيما.

واحنا وحدة الوطن ما فيه تبديل...
حــمات التّــوحيد مـانا شــرذيما.

وش جاب لجاب و محال التمثيل...
من لـبىٰ من امّـه لي رضـع بهـيما.

نسيم بن سعيد قريشي
17/9/2020_امخادمة-بــسكرة.

الله عــلى جـرحك وش دار فـيّا...
الله عــلى بـعدك لـي زاد اعـــناد

والله عــلى روحـك ديــما حــيّا...
بـين جـناحي خلّات الڨلب رماد

منين ننساك وانتي في جواجيّا...
في دمّي سـريتي ما خليتي واد

نـبات و انـتي نــايمة في عينيّا...
مـنين يا ولـفي نـرڨد كي العباد

جـرحك كالشّوك فاللّحمة الحيّا...
وصبري كحاكم جـمرة بلا تنهاد

كل ما يـرن الهـاتف نڨــول هيّا...
يتمحمح ڨلبي فيه ڨدحو زناد

وامزون الدّمع في ليلة شتويّا...
ما بلت ريڨي ما رجـعو البـعاد

نولّي نڨول ڨلبي لي دارها بيّا...
ماشاور ما ڨال ولاحني في واد

نصبر علّي بقالي و نعيش مزيّا...
العيشة بلا بيك غي دمعه وسواد.

نسيم بن سعيد قريشي
18/01/2021 امخادمة_بسكرة.